DAGA HASSAN UMAR GWAMMAJA
Binciken da muka gudanar ya nuna cewa saukar farashin kayan abinchin yana da nasa da matakin da Hukumar karbar korafe-korafe da yaki da cin hanci da rashawa ta jihar kano ta gudanar.
Idan za’a iya tunawa a ranar lahadin da ta gabata shugaban hukumar karbar korafe-korafen da hana cin hanci da rashawa ta jihar kano Barr. Muhuyi Magaji Rimin Gado ya kai samame Kasuwar Dawanau Dake Karamar Hukumar Dawakin Tofa, musamman Wuraren ajiyar kayan, inda ya kama Wuraren ajiyar kayan abinchi makare da kayan masarufi kamar Taliya da Sukari da dai sauransu.
Bayan kama kayan ne shugabannin kungiyar Singa suka ziyarci Barrista Muhuyin tare da yi masa alkawarin zasu rage farashin kayan masarufi kafin zuwan Azumin Watan Ramadana.
Hakan ce tasa a wannan makon musamman daga ranar larabar da ta gabata al’umma suka fara samun saukin kayan abinchi.
Mun shiga cikin kasuwar yan hatsi ta Dawanau Dake Jihar Kano A Najeriya domin Jin yadda farashin kayan suke a kasuwar , Inda muka iske kayan abinchin musamman dangin hatsi suka fara saukowa.
Ga yadda farashin buhun kayan yake a makon da ya gabata da kuma yadda ake sayar dasu a yau:
* Masara 57,000 yanzu kuma 47,000 zuwa 48,000
* Dawa 50,000 yanzu kuma 44,000 zuwa 45,000
* Gero 57,000 yanzu kuma 50,000 zuwa 51,000
” Shinkafa Shan shara 44,000 yanzu kuma 33,000 zuwa 33,500
Rahotanni da muka hada sun tabbatar da cewa matakin da Hukumar karbar korafe-korafe da hana cin hanci da rashawa ta jihar kano ta dauka ya taimaka matuka wajen fito da kayan da kuma karyewar farashin.
Ko a jiya ya yin wata ganawa da shugaban kasa Bola Tinubu yayi da gwamnonin Nigeria ya yabawa gwamnatin jihar Kano bisa wancan aikin da ta yi na fara kama masu boye kayan masarufin tare kuma da umartar sauran jihohi da su yi koyi da Kano.
Haka zalika, Shugaba Tinubu ya baiwa hukumomin tsaro Umarnin kama duk wanda aka samu da boye kaya a duk fadin Kasar. Umarnin da Za’a iya cewa ya fara aikin domin a safiyar yau juma’a kadaura24 ta rawaito cewa hukumar kare hakkin mai saya da mai sayarwa ta kasa a tufe Kantin Sahad stores dake Babban birnin tarayya Abuja.
