Tsohon Mataimakin Shugaban Kasa, Atiku Abubakar, tare da wasu fitattun jiga-jigan jam’iyyar ADC, sun gudanar da zanga-zanga zuwa hedikwatar Hukumar Zabe Mai Zaman Kanta ta Kasa (INEC) da ke Abuja, domin nuna rashin jin dadinsu kan abin da suka bayyana a matsayin tauye hakkinsu a cikin jam’iyyar.
Masu zanga-zangar sun zargi shugabancin INEC da katsalandan da kuma nuna rashin adalci, wanda suka ce na hana wasu bangarori gudanar da harkokinsu yadda ya kamata a cikin ADC.
Da yake jawabi, Atiku Abubakar ya bayyana cewa zuwansu INEC na da nufin neman hukumar ta sa baki, tare da tabbatar da cewa ana bin doka da ka’idojin jam’iyya wajen tafiyar da harkokinta.
Ya kuma gargadi cewa idan ba a dauki matakin gaggawa ba, rikicin na iya haifar da illa ga dimokuradiyya da kuma hadin kan ‘yan siyasa a Najeriya.
Masu zanga-zangar sun bukaci INEC da ta gudanar da cikakken bincike kan rikicin da ke addabar jam’iyyar ADC, tare da daukar matakan da suka dace domin dawo da zaman lafiya da adalci.
A yayin zanga-zangar, jami’an tsaro sun bazu a wurin domin tabbatar da zaman lafiya, inda aka gudanar da komai cikin lumana ba tare da wata hatsaniya ba.
Wannan mataki na zuwa ne a daidai lokacin da rikici ke kara kamari tsakanin bangarori daban-daban na jam’iyyar ADC, lamarin da ke ci gaba da janyo cece-kuce a fagen siyasar kasar nan.
Rahotanni sun nuna cewa rikicin shugabanci a jam’iyyar na gaban kotu, yayin da ake ci gaba da samun sabani a tsakanin mambobinta.
Daga cikin wadanda suka halarci zanga-zangar akwai Rabiu Musa Kwankwaso, Aminu Waziri Tambuwal, Peter Obi, Rauf Aregbesola da kuma Dino Melaye, tare da sauran jiga-jigan siyasa.
