Kuɗin ku na cikin tsaro – CBN ya faɗawa Kwastomomi
Babban Bankin Najeriya (CBN) ya jaddada kudirinsa na tabbatar da daidaiton tsarin hada-hadar kuɗi na ƙasa, inda ya bayyana cewa ana gudanar da bincike akai-akai domin gano matsalolin da ke tattare da bankuna.
Wannan na ƙunshe ne cikin wata sanarwa da mukaddashin daraktan yada labarai na Babban bankin Mrs. Hakama Sidi Ali ta fitar a ranar Talata.
Sanarwar ta ce CBN na ƙara jajircewa wajen tabbatar da daidaito da amincin tsarin hada-hadar kuɗi ga Bankunan Najeriya.
Babban bankin ya lura da muhimmiyar rawar da ƙwarin guiwar kwastomomi ke takawa wajen gudanar da ayyukan banki, kuma yana so ya tabbatar da cewa duk kuɗaɗen da ke ajiye a bankunan Najeriya suna cikin tsaro da salama.
Wannan na zuwa ne bayan matsalolin da abokan hulɗar bankuna ke fuskanta a kwanakin nan yayin hada-hadar kuɗi.
