Fadar gwamnatin Amurka – White House ta ce ta kori shugabar hukumar yaki da cutuka ta kasar Susan Monarez bayan da ta ki yarda ta ajiye aikinta a ranar Laraba.
A wata sanarwa ta fadar ta ce tsarin Dr Monarez ya saba da manufar Shugaba Donald Trump, saboda haka an cire ta daga shugabancin hukumar ta lafiya.
Tun da farko ma’aikatar lafiya ta Amurka ce ta sanar da saukar darektar, wanda hakan ya sa lauyoyin Dr Monarez suka fitar da sanarwa da a ciki suka ce ba a gaya mata sallamar tata ba kuma ba za ta sauka daga aikin ba.
Lauyoyin sun ce gwamnati ta dora mata karan-tsana ne saboda ta ki yarda ta zama rakumi da akala kan manufofi da umarnin gwamnati marassa kan gado da za su iya jefa lafiyar al’umma cikin hadari, tare kuma da zargin sakataren harkokin lafiya na Amurkan Robert F Kennedy Jr da amfani da harkokin lafiyar al’umma a matsayin makami.
Bayan wannan wasika ta lauyoyin nata ne sai kuma fadar gwamnatin Amurka ta fitar da wata sanarwa wadda a ciki take cewa – kamar yadda lauyoyin Susan Monarez suka tabbatar – a wasikarsu matar ta yi hannun riga da manufofi da tsare-tsaren Trump, a don haka an cire ta daga mukamin darektar hukumar yaki da cutaka ta Amurka, (CDC).
Shugaba Trump ne ya zabi Dr Monarez wadda ta dade a matsayin masaniyar kimiyya ta gwamnatin Amurka – ta shugabanci hukumar hana bazuwar cutukan – kuma a watan Yuli ne majalisar dattawan kasar ta amince da ita.
Trump ya zabe ta ne a wannan mukami bayan da ya janye sunan mutumin da ya fara zaba da zai shugabanci hukumar – tsohon dan majalisar wakilai na jam’iyyar Republican, Dave Weldon – wanda aka soke shi a kan ra’ayinsa game da riga-kafi da kuma cutar galhanga.
Sanarwar barin Dr Monarez wannan shugabanci na hukumar – da ma’aikatar lafiya ta Amurka ta yi ke da wuya sai wasu manyan shugabannin hukumar akalla su uku su ma suka sanar da saukarsu daga mukamansu na hukumar.
Saukar manyan jami’an da ta zo tamkar watsewar ‘ya’yan zabi – ta kasance ne kan yadda kwararru a harkar lafiya ke nuna damuwa a kan yadda hukumar ke daukar harkar rigakafi a karkashin jagorancin sakataren harkokin lafiya na Amurka Kennedy – wanda mutum ne da ke nuna shakku da tababa a kan allurar rigakafi.
