Shugaban ƙasar Turkiyya, Recep Tayyip Erdogan, ya yi kira ga Rasha da Azerbaijan su yi haƙuri da juna a yayin da ake samun ƙaruwar fargaba a tsakanin ƙasashen biyu, yana mai jaddada cewa Ankara tana da “dangantaka mai ƙarfi” da Moscow da Baku.
Babban burin Ankara shi ne kada wasu abubuwan da ba su kamata ba su jawo ɓarnar da “ba za ta gyaru ba” a tsakanin Moscow da Baku, in ji Erdogan yayin da yake magana da manema labarai a cikin jirgi a kan hanyarsa ta komawa gida da daga Azerbaijan.
Da yake magana kan yarjejeniyar zaman lafiya tsakanin Armenia da Azerbaijan, Erdogan ya ce: “Za mu shaida buɗe sabbin damarmaki ta hanyar yarjejeniyar zaman lafiya.”
Game da hanyar Zangezur, wata hanya mai muhimmanci da za ta haɗa yammacin Azerbaijan da yankin Nakhchivan da kuma zama wata mahaɗa daga China zuwa Turkiyya da Rasha, Shugaba Erdogan ya ce wannan hanya tana bayar da dama ba kawai ga Azerbaijan ba, har ma ga dukkan yankin.
Ya bayyana cewa Ankara tana kallon wannan hanya a matsayin wani ɓangare na “juyin juya halin tattalin arziki.”
Ko da yake Armenia ta fara nuna adawa da hanyar Zangezur, yanzu Yerevan tana nuna sassaucin ra’ayi wajen shiga cikin haɗin kan tattalin arziki, in ji shi.
Game da batun isar da jiragen F-35 tsakanin Washington da Ankara, Shugaba Erdogan ya ce yana sa ran a fara isar da jiragen F-35 zuwa Turkiyya a hankali a lokacin mulkin Trump, yana fatan shugaban na Amurka zai “cika alkawarinmu.”
Batun F-35 ba kawai game da fasahar soja ba ne ga Turkiyya, in ji Shugaba Erdogan, yana mai cewa: “Haka ma game da karfafa hadin kai a mataki na duniya, musamman NATO.”
Ana samun rashin ɗorewar zaman lafiya a yankin saboda karya yarjejeniyar tsagaita wuta da Isra’ila ta yi, in ji Shugaba Erdogan, yana mai cewa Ankara tana aiki don hana sake faruwar hakan a wannan karon.
Turkiyya ta yi imani cewa yarjejeniyar tsagaita wuta tsakanin Iran da Isra’ila ta kuma bude kofa ga yarjejeniyar tsagaita wuta a Gaza, in ji shugaban, yana mai cewa Hamas ta sha nuna kyakkyawan niyya a kan wannan batu.
Game da Syria, Erdogan ya ce Türkiye ta bayyana iyakokinta a fili kan Syria, yana mai cewa kasar ba za ta yarda da kowane shiri da ke neman halatta ƙungiyoyin ta’addanci ko abokan aikinsu ba.
