Gobara Ta Tashi a Rano, Ba Ta Yadu Ba
A ranar Talata, 25 ga Agusta, 2026, an samu tashin gobara guda ɗaya a wata gidan mai da ke yankin ƙaramar hukumar Rano, a Jihar Kano.
Gobara ta tashi ne a kamfanin Tukur Muhd Nig. Limited, da ke kan titin Saya Saya a Rano. Da misalin ƙarfe 9:20 na dare, sashen bayar da agajin gaggawa na tashar kashe gobara ta Rano ya samu kiran neman agaji daga manajan kamfanin, Abubakar Umar, wanda ya sanar da su tashin gobarar.
Jami’an kashe gobara na tashar Rano sun garzaya wurin nan take. Bayan isarsu, sun tarar da gobarar a wani ginin bene guda, mai girman kusan ƙafa 200 x 100, wanda ake amfani da shi a matsayin gidan mai.
Rahoton ya ce gobarar ta samo asali ne daga wani janareta kirar Mikano, inda ta shafi tayoyin baya na wata motar CANTER, waɗanda suka ɗan kama da wuta.
Sai dai jami’an kashe gobarar sun yi nasarar shawo kan lamarin tare da hana wutar yaɗuwa zuwa sauran sassan gidan man. An danganta musabbabin gobarar da matsala da ta samu a cikin janareta.
Daraktan Hukumar Kashe Gobara ta Jihar Kano, Alhaji Sani Anas, ya yi kira ga al’umma da su kasance cikin taka-tsantsan tare da ɗaukar matakan kariya domin rage yawaitar tashin gobara.
Ya kuma buƙaci jama’a su tanadi na’urorin kashe gobara masu aiki a gidajensu da wuraren kasuwancinsu, tare da tabbatar da bin dukkan ƙa’idojin kare kai daga gobara a kowane lokaci.
