Daga: Hassan Umar Gwammaja
Majalisar Dokokin ƙasar Ghana ta amince da wata dokar da ta jawo cece-kuce, wadda ke haramta alaƙar jinsi ɗaya da sauran ayyukan da ke da alaƙa da ƙungiyar LGBTQ+, tare da tanadar hukunci masu tsauri ga waɗanda dokar ta shafa.
Sabuwar dokar ta tanadi daurin shekaru uku a gidan yari ga mutanen da aka bayyana a matsayin masu alaƙa da LGBTQ+, ciki har da masu dangantakar jinsi ɗaya, sannan ta kuma wajabta wa jama’a sanar da jami’an tsaro idan sun samu bayanan ayyukan da dokar ta haramta.
A halin yanzu, dokar na jiran amincewar Shugaban Ƙasar Ghana, John Mahama, kafin ta fara aiki a hukumance.
’Yan majalisar da masu goyon bayan dokar sun bayyana cewa manufarta ita ce kare al’adun Ghana da kuma martabar tsarin iyali. A cewarsu, dokar za ta ƙarfafa dokokin da ake da su tare da sauƙaƙa aiwatar da su yadda ya kamata.
Haka kuma, ƙungiyoyin addini a ƙasar sun nuna goyon baya ga dokar, suna masu kira da a ƙara tsaurara matakan shari’a kan ayyukan LGBTQ+.
Baya ga haramta ayyukan LGBTQ+, dokar ta kuma shafi mutanen da ke bayyana goyon baya ko fafutukar kare haƙƙin masu irin wannan akida.
A ƙarƙashin sabbin tanade-tanaden, irin waɗannan mutane na iya fuskantar hukuncin ɗauri a gidan yari.
Sai dai an bayyana cewa akwai wasu keɓantattun rukuni da dokar ba za ta shafa kai tsaye ba, ciki har da lauyoyi, ’yan jarida da ma’aikatan lafiya da ke gudanar da ayyukansu na ƙwararru dangane da batutuwan da suka shafi LGBTQ+.
Ƙungiyoyin kare haƙƙin bil’adama, ciki har da Human Rights Watch, sun soki dokar, suna gargadin cewa za ta iya jefa masu alaƙa da LGBTQ+ cikin haɗari tare da ƙara nuna musu wariya a cikin al’umma.
Ƙungiyoyin sun kuma yi kira ga ’yan majalisar Ghana da su sake nazarin dokar, suna masu cewa ta saɓa wa wasu muhimman ƙa’idojin kare haƙƙin ɗan adam.
Tun kafin wannan lokaci, alaƙar jinsi ɗaya ta kasance haramtacciya a Ghana bisa wasu tsofaffin dokoki da aka gada tun zamanin mulkin mallaka.
Irin wannan doka ta samu amincewa a shekarar 2024, amma ba ta zama doka ba saboda wasu matsalolin shari’a da siyasa da suka hana shugaban ƙasa sanya mata hannu.
Idan Shugaba Mahama ya amince da sabuwar dokar, Ghana za ta shiga cikin jerin ƙasashen Afirka da suka ƙara tsaurara dokoki kan LGBTQ+, tare da ƙasashe irin su Uganda da Senegal waɗanda suka aiwatar da makamantan dokoki a shekarun baya-bayan nan.
