Hukumar Kwastam ta ƙasa (NCS) ta sanya ranar 14 ga Oktoba domin gudanar da jarrabawar Computer-Based Test (CBT) ga masu neman aiki a matakin Superintendent a fadin shiyya shida na kasar.
Hukumar ta sanar da hakan ne a shafinta na X (tsohon Twitter) da kuma Facebook da aka tantance, ranar Juma’a.
An bayyana cewa wannan ita ce jarrabawa ta karshe ta CBT ga dukkan wadanda suka ci gaba a matakin Superintendent, kuma za a gudanar da ita a lokaci guda a jihohi da cibiyoyin da aka ware, a jiharsu ta asali.
Kamfanin Dillancin Labarai na Najeriya (NAN) ya ruwaito cewa, wadanda suka cancanta su ne wadanda aka tabbatar da takardunsu, kuma suka riga suka yi pre-test da live test.
NAN ta kuma tuna cewa an riga an gudanar da jarrabawar CBT ga matakan Inspectorate da Customs Assistant a ranar 9 ga Oktoba.
An bayyana cewa duk masu bukatar da suka wuce matakan baya, dole ne su shiga shafin https://updates.customs.gov.ng ta amfani da Lambar katin ɗan Kasa (NIN) domin duba cikakken bayanin jarrabawar su, ciki har da wurin da aka ware musu.
