Shugaban kasar Ghana, Nana Akufo-Addo, ya yi kira ga shugabanni da gwamnatocin kasashen Afirka da su hada kai, su dau matakin zuba hannun jari na kashi talatin cikin dari a cibiyoyin hada-hadar kudi na Afirka da nufin inganta ma’aunin wadannan cibiyoyi yadda za su tallafawa ci gaban Afirka.
Shugaba Akufo-Addo ya yi wannan kira ne a yayin jawabin da ya gabatar a taron shugabannin kasashe da na gwamnatocin Afirka da aka gudanar a taron shugabannin kungiyar Tarayyar Afirka (AU) karo na 37.
Taron, wanda aka yi wa taken “Kafa cibiyoyin hada-hadar kudi ta Tarayyar Afirka a tsarin ajandar Afirka don sake fasalin tsarin hada-hadar kudi na duniya.”
Shugaban ya nuna cewa, a halin yanzu, dukkan kasashen Afirka suna ware kashi dari bisa dari (100%) na asusunsu na ketare ga cibiyoyin hada-hadar kudi da ke wajen Afirka, duk kuwa da cewa hakan ba ya kawo wani alfanu ga nahiyar.
Yace “dukkanmu mun yarda cewa yadda tsarin hada-hadar kudi na duniya ke aiki ba ya taimaka mana [Afirka], kuma akwai bukatar yin wasu muhimman sauye-sauye a tsarin. Amma yin hakan kuma na buƙatar mu [‘yan Afirka] mu ɗauki wasu matakai da za su taimaka mana wajen samun kudaden da za su tafiyar da tattalin arzikinmu”.
Shugaban ya kara da cewa, idan har aka samu hanyar kara karfin samun kudade ga cibiyoyin Afirka, to lallai an samu turbar samar da kudaden ci gaban Afirka.
Bincike da aka gudanar ya zuwa shekarar 2021, na cewa jimillar ajiyar kasashen Afirka dake kasashen waje ya kai kimanin dalar Amurka tiriliyan 1.1.
Mai sharhi kan tattalin arziki da harkokin kudi, Hamza Attijjany yace “kudaden da ake ajiyewa a wasu bankuna, musamman a Turai; daloli ne, wasu kuma Yuro, wasu ma gwal ne ake ajiyewa. A duk lokacin da kasar ta shiga matsalar karayar darajar kudi ko kuma in kasar za ta yi cinikayya da kasashen waje sai a yi amfani da wadannan kudaden.”
