Rundunar ƴan sandan birnin tarayya Abuja ta samu nasarar cafke wani fasto bisa zargin yin safarar ƙananan yara
Kakakin rundunar ƴan sandan birnin, Josephine Adeh, ta ce an cafke faston ne tare da wasu mutum biyu lokacin da suke safarar yaran
Ta bayyana cewa yaran waɗanda su 12 ne an yi safararsu ne zuwa jihar Ogun lokacin da ƴan sanda suka tare motar da ke ɗauke da su
Jami’an na tawagar RRS 74, sun cafke faston ne mai suna Simon Kado, ɗan uwansa, Jesse Simon-Kado, da direbansu, Muhammad Isah, bisa zargin yin safarar yaran.
Adeh ta ce jami’an ƴan sandan na RRS 74 sun tare motar ne ƙirar Toyota Hiace mai ɗauke da lamba APP 489 XE, a ranar Juma’a da misalin ƙarfe 12:55 na dare.
