Daga Hassan Umar Gwammaja
Wani mummunan hari da wasu ‘yan bindiga suka kai a kauyen Kanya da ke karamar hukumar Danko/Wasagu a Jihar Kebbi, ya yi sanadin mutuwar mutum daya, kana uku suka jikkata.
Har ila yau, sun yi awon gaba da wasu mutane takwas, tare da basaraken Garin, Alhaji Isah Daya. An kai harin ne da tsakar dare a ranar Asabar.
Rahotanni sun ce ‘yan bindigar sun kai farmaki kauyen ne inda suka kashe Sherrif Alhaji Almu, tare da jikkata wasu mutane uku da ke kwace a asibiti a halin yanzu.
Jami’in hulda da jama’a na rundunar ‘yansandan jihar Kebbi, SP Nafui Abubakar, ya tabbatar da faruwar harin. Ya bayyana cewa, rundunar hadin gwiwa ta jami’an tsaro karkashin jagorancin ‘yansanda ta kaddamar da aikin ceto mutanen da aka sace tare da tabbatar da cewa ta cafke wadanda suka aikata laifin.
“Gwamnatin jihar Kebbi ta samar da kayan aikin da suka dace don yakar ‘yan bindiga a yankunan da abin ya shafa, musamman masarautar Zuru,” in ji SP Nafi’u Abubakar.
Wannan lamari dai ya biyo bayan wani hari da wasu ‘yan bindiga dauke da makamai suka kai a karamar hukumar Suru, inda aka kashe shugaban jam’iyyar APC, tare da yin garkuwa da mutum daya a kauyen Matseri da ke karamar hukumar Bunza a cikin makon da ya gabata.
