Hukumar yaƙi da fataucin miyagun ƙwayoyi NDLEA ta kasa ta yi nasarar kama hodar ibilis wadda aka boye a cikin littattafan addini da ake shirin kaiwa Saudiyya.
A sanarwar da NDLEA ɗin ta fitar ta bayyana cewa an ɓoye ɗauri 20 na hodar wanda jumullar nauyinsu ya kai gram 500 a cikin littattafan addini.
Hukumar ta ce jami’an ta sun gano hodar ne a yayin da suke gudanar da bincike a wani kamfanin da ke jigilar kayayyaki a Legas, yayin da yake shirin kai kayayyakin zuwa Saudiyya.
Baya ga haka hukumar ta NDLEA ta yi ƙarin bayani game da wasu jerin nasarori da ta samu a makon da ya gabata a fannin daƙile fataucin miyagun ƙwayoyi.
A wani kamfanin na daban da ke jigilar kayayyaki, hukumar ta NDLEA ta ce ta kama kilo 2.8 na tabar wiwin wadda aka shigar da ita ƙasar daga Amurka.
A Kano, jami’an NDLEA sun kama wani matashi ɗan shekara 22 da haihuwa da ke sayar wa ‘yan fashi da haramtattun kayayyaki a lokacin da suke sintiri a hanyar Bichi zuwa Kano, yayin da yake kan hanyarsa ta zuwa Katsina ɗauke da kwalabe 277 na allurar pentazocine a ɗaure a cinyarsa da kuma cikin al’aurarsa.
Kazalika hukumar ta ce ta kama wani mutum da ake zargi mai suna Mohammed Abdulrahman Abdulaziz, mai shekaru 43, a unguwar Rimin Kebe da ke karamar hukumar Nasarawa, tare da sinƙin wiwi nau’in skunk 68, wanda nauyinta ya kai kilo 30.
