Ƙasar Ukraine, ta yi kira ga ƙawayenta da su ƙara matsin lamba kan Rasha bayan Moscow ta yi amfani da sabon makami mai linzami da ta ƙera wajen kai hare-hare a yammacin Ukraine.
A ranar Juma’a, Rasha ta ce ta yi amfani da makami Mai linzami na Oreshnik a cikin jerin hare-haren da aka kai da daddare kan biranen Kyiv da Lviv a yammacin Ukraine. Kyiv ta bayyana amfani da wannan makami kusa da iyakar Tarayyar Turai da NATO a matsayin babbar barazana ga tsaron Turai.
Ma’aikatar Tsaron Rasha ta ce sojojin ƙasar sun yi amfani da sabon makamin mai matsakaicin zango tare da daruruwan wasu makamai a hare-haren, wanda a cewar Ukraine ya yi sanadin mutuwar mutane huɗu tare da jikkata aƙalla 22 a babban birnin ƙasar.
Haka kuma Rasha ta kai hari kan muhimman gine-ginen ababen more rayuwa a birnin Lviv ta amfani da wani makami mai linzami da ba a tantance nau’insa ba, kamar yadda Magajin Garin Lviv, Andriy Sadovyi, ya bayyana.
Daga bisani Rundunar Sojin Sama ta Ukraine ta ce makamin ya yi tafiya da saurin kilomita 13,000 a cikin sa’a guda (fiye da mil 8,000 a awa), kuma ana ci gaba da bincike domin gano ainihin nau’in rokar da aka yi amfani da ita.
