Gwamnatin tarayya zata rage bashin da zata ciyo da Tiriliyon hudu na fannin lantarki

Gwamnatin Tarayya ta Fitar da Tsarin Rage Bashin Naira Tiriliyan 4 a Sashen Wutar Lantarki Domin Farfaɗo da Zuba Jari da Inganta Gyaran Makamashi
‎
‎Gwamnatin Tarayyar Najeriya ta ɗauki mataki mai ƙarfi domin dawo da daidaiton kuɗi da kuma amincewar masu zuba jari a kasuwar wutar lantarki, ta kammala tsarin aiwatarwa na Shirin Rage Bashin Sashen Wutar Lantarki na Naira Tiriliyan 4, wani muhimmin shiri da Shugaba Bola Ahmed Tinubu ya amince da shi.
‎
‎ Wannan shiri ya na da nufin magance manyan matsalolin tsarin da suka dade suna haddasa tangarda tare da shimfiɗa harsashin zuba jarin masu zaman kansu a manyan matakai da kuma ci gaban tattalin arziki mai ɗorewa.
‎
‎ Majalisar Zartarwa ta Ƙasa ta amince da wannan shiri a watan Agustan 2025, inda aka bada ikon fitar da takardun lamuni na gwamnati har zuwa Naira Tiriliyan 4 domin biya wa kamfanonin samar da wuta da masu samar da iskar gas bashin da aka tabbatar.
‎
‎Wannan shi ne mafi girman matakin shiga tsakani da aka yi cikin fiye da shekara goma, domin magance tsoffin basussukan da suka daɗe suna hana zuba jari, raunana kudaden kamfanonin wuta, da kuma jawo matsalar rashin ingantaccen samar da lantarki a faɗin ƙasa.
‎
‎Bayan biyan bashin, wannan shiri na rage bashi na nufin yin sabon tsari na farfaɗo da kasuwar lantarki ta ƙasa, ta hanyar dawo da ƙarfafa kamfanonin samar da lantarki, ƙarfafa sabbin jarin gina hanyoyin samar da wuta, sabunta layukan wutar kasa, da inganta isar da lantarki ga gidaje da kasuwanci.
‎
‎ Wadannan matakai za su gina tubalin masana’antu, samar da ayyukan yi, da bunƙasa tattalin arziki mai fa’ida ga kowa.
‎
‎A cewar Uwargida Olu Verheijen, Mai Ba Shugaban Ƙasa Shawara kan Harkokin Makamashi:
‎
‎“Burinmu shi ne ƙirƙirar yanayi mai dacewa da zuba jari — daga sabunta layukan wuta, inganta rabon wuta, zuwa haɓaka samar da wuta cikin gida. Ta hanyar rufe gibin mita, daidaita farashi da tsarin kashe kudi yadda ya dace, inganta tsarin tallafi ga mabukata, da dawo da amincewa da hukumomin tsara doka, muna wucewa daga matakan gaggawa zuwa samar da dorewar ingantacciyar wuta, tare da gina amincewar da ke jawo manyan jarin masu zaman kansu.”
‎
‎