Gwamnatin Kano ya umarci hukumar Hisbah ta sa kafar wando daya da masu aniyar tallata auren jinsi

Gwamnatin jihar Kano ta sake daukar mataki kan wasu kungiyoyi da ake zargin suna rajin kare ‘yancin masu auren jinsi a jihar.

Gwamna Abba Kabir Yusuf ya ba hukumar Hisbah umarnin cafke duk wata kungiya da take tallata auren jinsi a fadin jihar Kano.

Mai tallafawa gwamnan ta fuskar kafofin sada zumunta, Abdullahi I. Ibrahim ne ya bayyana hakan a sanarwar da ya fitar a shafinsa na X.

Abdullahi Ibrahim ya ce:
“Gwamnan jihar Kano, Abba Kabir Yusuf ya umurci hukumar Hisbah da ta cafke kungiyoyin da ake zargi da tallatawa da kuma fafutukar kare hakkin masu auren jinsi a Kano.”

Sanarwar ta ce tallatawa ko kuma kare ‘yancin masu auren jinsi ta hanyar bayyanawa a fili ya saba da dokar jihar Kano.