Kwarya-kwaryan kasafin kudi na shekarar 2023 ya samu amincewar Majalisar dokokin jihar Kano a makon nan
‘Yan majalisar sun yi na’am da bukatar Abba Kabir Yusuf na kashe karin Naira biliyan 24 a shekarar nan ta 2023
An amince da bukatar Mai girma Gwamnan Kano bayan kasafin kudin masarautu ya jawo muhawara a majalisar
Shugaban masu rinjaye a majalisa, Lawal Husseini mai wakiltar Dala ya ce amincewa da kasafin zai bada damar yi wa mutanen Kano aiki.
Hon. Lawal Husseini yake cewa a haka gwamnati za ta bunkasa harkar ilmi da lafiya kuma a biya tsofaffin ma’aikatan da su ka yi ritaya hakkokinsu.
Sai dai ba haka nan aka amince da bukatar Abba Kabir Yusuf ba, sai da wata ‘yar hayaniya ta kaure tsakanin ‘yan majalisar na jihar Kano.
