Shugaban Amurka, Donald Trump, ya amince a hukumance da wata muhimmiyar yarjejeniya da Masarautar Saudiyya, wadda za ta bai wa ƙasar damar kafa shirin makamashin nukiliya na farar hula, kamar yadda wasu jami’an gwamnatin Amurka suka bayyana.
A cewar jami’an, yarjejeniyar za ta taimaka wa Saudiyya wajen bunƙasa amfani da makamashin nukiliya domin ayyukan farar hula, ciki har da samar da wutar lantarki da sauran bukatun ci gaba.
Haka kuma, yarjejeniyar na iya buɗe ƙofa ga Saudiyya ta fara tace sinadarin uranium a cikin ƙasarta, wani mataki da ake ganin yana da matuƙar muhimmanci a fannin makamashin nukiliya.
Sai dai har yanzu ba a bayyana cikakken bayani kan yadda za a aiwatar da yarjejeniyar ba, yayin da masana ke ci gaba da bibiyar tasirin da za ta iya yi ga tsaro da siyasar yankin Gabas ta Tsakiya.
