Sojojin Nijeriya sun kaddamar da jirgin yaƙi mara matuƙi (attack drone) na farko da aka ƙera a cikin gida, lamarin da suka bayyana a matsayin babban ci gaba a ƙarfin Afirka na ƙirƙira da kera nata fasahar tsaro.
An gina jirgin ne tare da haɗin gwiwar kamfanin fasahar Nijeriya mai suna Briech UAS, kuma an nuna shi a hedkwatar kamfanin da ke Abuja a watan Afrilu na shekarar 2025.
Duk da cewa ba a bayyana cikakkun bayanan fasaharsa ba, Babban Hafsan Tsaro, Janar Christopher Musa, ya jaddada cewa za a yi amfani da jirgin wajen yaƙi da ’yan ta’adda, kuma zai ba Nijeriya wata muhimmiyar hanyar samun makamai daga cikin gida.
“Ta hanyar kera waɗannan jirage a cikin gida, Nijeriya na rage dogaro da ƙasashen waje, tana tabbatar da saurin samuwar makamai, tare da ƙarfafa ikon ta na ba da martani cikin gaggawa ga barazanar tsaro,” in ji Musa. “Na tabbata, da hazikan da muke da su, musamman matasa, za mu iya ƙera wani abu mai matuƙar ban sha’awa.”
Rahoton The Defense Post ya bayyana cewa jirgin nau’in kamikaze ne, wanda aka ƙera domin ɗaukar abubuwan fashewa, kuma ana iya jagorantarsa ya tarwatse da zarar ya bugi abin da aka nufa.
Ana sa ran wannan jirgi zai ƙara wani sabon salo ga ayyukan yaƙi da ta’addanci na Nijeriya, waɗanda tuni suka haɗa da jiragen sa ido marasa matuƙa, jiragen drone masu makamai, da jiragen yaƙi masu matuƙa.
Shugaban kamfanin Briech UAS, Bright Echefu, ya ce ƙungiyoyin ta’addanci irin su Boko Haram da Islamic State West Africa Province (ISWAP) na amfani da jiragen drone na kasuwa wajen leƙen asiri da kai hare-hare.
“An yi amfani da waɗannan jirage wajen bin diddigi da kai hari kan sojojinmu. Ana kuma amfani da su wajen tsara kwanton bauna da aiwatar da hare-haren sama na ƙanƙani,” in ji Echefu. “Mun sadaukar da kanmu wajen haɓaka nagartattun jiragen sa ido da na kai hari da suka dace da ƙalubalen da ƙasarmu ke fuskanta.”
Gwamnan Jihar Plateau, Caleb Mutfwang, wanda ya halarci bikin ƙaddamarwar, ya ce ana buƙatar sabbin makamai da fasaha irin wannan jirgi domin tunkarar dabarun yaƙi marasa daidaito da ’yan tawaye ke amfani da su.
“A matsayinta na ƙasa, mun yi kuskure da muka bari ƙungiyoyin da ba na gwamnati ba su samu ƙwarewa da kusan ta kai ta hukumomin gwamnati,” in ji Mutfwang. “Lokaci ya yi da za a gyara wannan rashin daidaito.”
