Kar ku bari ƴan bindigâ su ƙwace lamarin zanga-zanga – Akume ya gargaɗi ƴan Najeriya
Sakataren Gwamnatin Tarayya (SGF) George Akume ya gargaɗi ƴan Najeriya da kada su bari ƴan fashi da makami da masu tayar da ƙayar baya su ara su haye kan lamarin zanga-zangar da aka shirya yi a ranar 1 ga watan Agusta.
Akume ya yi wannan kiran ne a ranar Laraba a wani taron manema labarai a Abuja sa’o’i kafin gudanar da zanga-zangar.
A cewarsa matsalar tattalin arzikin da ƴan Najeriya ke fama da ita za ta ragu nan da wani lokaci yayin da sauye-sauyen Gwamnati suka fara samar da sakamako mai kyau.
Ya nanata cewa Shugaban ƙasa Bola Tinubu ɗan Dimokradiyya ne wanda ya amince da hakkin kowane dan kasa na yin zanga-zangar lumana.
Akume ya lura cewa ya kamata ƴan Najeriya su yi taka tsantsan kan lamarin.
Matsalolin tattalin arziƙin da ake fuskanta za su ragu nan ba da jimawa ba, kuma za mu ci gajiyar hakan lokaci mai tsawo nan gaba.
Domin kaucewa shakku, Gwamnatin Shugaba Tinubu ta amince da ƴancin gudanar da zanga-zangar lumana, amma kula da kuma taka tsantsan ya kamata su zama abin dubawa.
“Gwamnati tana fargabar illolin da ke tattare da zanga-zangar da masu tada ƙayar baya kan iya ara su haye da sauran masu aikata laifuka, maimakon haka Gwamnati ke rokon a bi hanyar tattaunawa domin magance Matsalolin, “in ji shi.
A nasa ɓangaren, Ministan yaɗa labarai da wayar da kan jama’a Mohammed Idris ya jaddada sabbin matakan tattalin arziki da Gwamnati ke ɗauka domin sauya rayuwar kowane ɗan Najeriya.
Ya bayyana nasarorin da Gwamnati ta samu a cikin shekarar da ta gabata da suka haɗa da sanya hannu kan tsarin biyan mafi karancin albashi na Naira 70,000, da cin gashin kan ƙananan Hukumomi, da shirin lamunin karatu ga daliban Najeriya da kuma tallafin noma kai tsaye ga manoma.
Ministan Kudi Wale Edun, da Ministan Kasafin Kudi da Tattalin Arziki Abubakar Bagudu, da Ministan Ma’adanai Dele Alake sun yi kira ga ƴan Najeriya da su ba da damar aiwatar da waɗannan sauye-sauyen tattalin arziki da Gwamnatin Tinubu tayi da za a amfana shekaru da yawa masu zuwa.
