Hukumar Hisbah a jihar Kano ta sanar da cewa ta kama akalla direbobin adaidaita sahu 52 saboda samunsu da laifuka daban-daban da suka hada da askin banza, sayar da miyagun kwayoyi da kuma cakuda maza da mata a kekensu da suke sana’ar jigilar mutane.
Jami’an Hisba sun kama direbobin ne a sassa daban-daban da ke birnin Kano kamar yadda wakiliyar aksammdia Jamila Sulaiman ta bayyana
A baya bayan nan ne Hisbar ta fitar da sanarwar cewa ta kaddamar da wani babban aiki mai taken ‘’ofireshin kau da badala’’ a yunkurin hukumar na kawo gyaran tarbiyya da kawar da miyagun dabi’u da suka hada da karuwanci, shaye-shaye, sayarwa da kuma kwankwadar barasa da sauransu.
Da yake jan kunnun direbobin su 52 a ranar Juma’a, Mujahid Aminuddeen, mataimakin shugaban hukumar Hisbah, ya bukaci su zama jakadu nigari ga addinin Musulunci da jihar Kano ta hanyar kauracewa dukkan wata badala.
A furucin sa ya ce: ‘’Muna son yin amfani da wannan dama domin yin roko a gareku da ku guji nuna dukkan wasu halaye da za su iya zubar da mutuncin addinin Musulunci da kuma kimar jihar Kano.
” Wane irin laifuka masu adaidaita sahun suka aikata a Kano? Ya kara da cewa laifukan da direbobin suka aikata sun hada;
‘’Askin banza, tuki a gari sanye da gajeren wando, amfani da hotuna da basu dace ba a jikin baburansu, cakuda maza da mata da kuma daukan ‘yan ta’adda zuwa wuraren da suke aikata miyagun laifuka.
‘’A matsayinmu na musulmai, ba zamu lamunci wannan halayya ta direbobin adadita sahun ba. Wannan ne kuma yasa kawo ku nan domin yi muku wa’azi akan illolin da ke tattare da wadannan ayyuka bisa tsarin addini da kuma al’adar mutanen jihar Kano.’’
