Daga Hassan Umar Gwammaja
A cikin wata sanarwa da jami’in hulɗa da jama’a na rundunar, CSP Abdullahi Kiyawa, ya fitar a Kano, yace an cafke waɗanda ake zargin ne a ranar 10 ga Afrilu 2026, Sakamakon sahihan bayanan sirri da jami’an tsaro suka samu.
Waɗanda ake zargin sun haɗa da Ahmad Ibrahim mai shekaru 24 da Isma’il Muhammad mai shekaru 22, dukkansu mazauna unguwar Dandinshe da ke ƙaramar hukumar Dala a jihar Kano.
Binciken ’yan sanda ya nuna cewa matasan na amfani da fasahar sauya murya wajen kiran mutane, inda suke gabatar da kansu a matsayin “Aljannu”, tare da yi wa wadanda suka kira barazanar fuskantar cuta idan ba su bi umarninsu ba.
Rundunar ta ce waɗanda ake zargin sun amsa laifin damfarar fiye da mutum 500, tare da karɓar kuɗaɗe da wasu kayayyaki daga hannun jama’a.
Haka kuma an ƙwato SIM guda 28 da ake zargin an yi amfani da su wajen aikata laifukan, yayin da bincike ke ci gaba domin gano sauran waɗanda ke cikin wannan ƙungiya.
