Jagoran adawa kuma ‘dan takarar shugaban kasa karo biyu, Atiku Abubakar, ya kalubalanci Bola Tinubu kan bashin NNPC na $3.3bn.
A wani dogon jawabi da ya yi a shafin sa na X, Alhaji Atiku Abubakar yace akwai bukatar ayi bayanin dalolin da aka aro domin a karfafa Naira
A jawabin da ya fitar a ranar Alhamis, Atiku Abubakar yace bashin yana dauke da ruwan 12%, kuma za a biya ne da danyen mai har na $12bn.
Wazirin Adamawa ya kuma jefawa gwamnatin tarayya kalubale kan dalilin amfani da SPV a kasar Bahamas da yace tana da kashi a gindinta.
Dan takaran na 2022 da 2023 yace abin mamakin shi ne har yanzu gwamnatin tarayya tayi gum game da lamarin, tun Agustan bara babu wani bayani.
“Idan jama’a sun samu bayani a kan bashin shi ne gajeren jawabin da NNPCL ta fitar.”
“Abin da ya fi rikitarwa a yarjejeniyar nan shi ne me zai jawo gwamnatin tarayya tayi rajistar kamfani a Bahamas alhali ta san badakalar kasar?”
A cewar Atiku, ana hako ganguna miliyan 1.38 ne duk rana a 2024, sai ga shi za ta rika cire ganguna 90, 000 duk rana domin a biya bashin.
Lissafin Atiku ya nuna za a bada ganguna miliyan 164.25 wanda darajarsu ya kai $12bn a farashin kasuwar yau domin biyan bashin $3.3bn.
