Rahotanni da ke yawo a kafafen sada zumunta sun yi ikirarin cewa shugaban Koriya ta Arewa, Kim Jong Un, ya ce kasarsa a shirye take ta bai wa Iran makamai masu linzami idan Tehran ta nemi hakan. An kuma yi zargin cewa ya ce makami guda kacal zai iya lalata Isra’ila gaba ɗaya.
Wannan furuci da ake dangantawa da Kim Jong Un ya bazu sosai a yanar gizo, inda ya jawo muhawara mai zafi a tsakanin masu sharhi kan harkokin siyasa da tsaro. Sai dai har yanzu babu wata sanarwa ta hukuma daga gwamnatin Koriya ta Arewa da ta tabbatar da cewa shugaban kasar ya yi irin wannan magana.
Masana harkokin siyasa sun bayyana cewa irin wadannan rahotanni na samun karbuwa ne saboda kusancin diflomasiyya tsakanin Koriya ta Arewa da Iran, da kuma matsayinsu na sukar manufofin Isra’ila da Amurka a yankin Gabas ta Tsakiya. Duk da haka, sun gargadi mutane da su rika tantance sahihancin bayanai kafin yada su.
Yayin da rikice-rikicen yankin ke ci gaba da kara kamari, kasashen duniya na ci gaba da sa ido kan alakar Iran, Isra’ila da Koriya ta Arewa. A halin yanzu, babu wata hujja tabbatacciya da ke nuna cewa Kim Jong Un ya yi wannan furuci ko ya yi tayin samar wa Iran makamai masu linzami kamar yadda ake yadawa.
