A farkon makon nan ne aka sami labarin cewa Naira ta cigaba da tashi a kasuwar canji, idan aka kwatanta ta da farashinta da Dalar Amurka.
A Rahoto jaridar The Cable ya bayyana cewa Naira ta dawo N1, 650 a kan kowace Dala a kasuwar bayan-fage da aka fi sani da kasuwar canji.
Naira ta tashi da fiye da 6% a ‘yan kwanakin nan, ma’ana Dalar Amurka ta rasa sama da N100 daga karshen makon jiya zuwa yau.
Idan za a tuna, a ranar Juma’ar da ta gabata, an saida kowace Dalar Amurka kan N1, 770 bayan farashin ya sauka a tsakiyar wata.
‘Yan kasuwar canji da ke Legas sun yi wa Dala farashi a kan N1, 650 idan mutum zai saida, masu saye kuwa suna biyan N1, 600.
A halin yanzu, ribar N50 ‘yan canji suke samu a kan kowace Dalar kasar Amurka a Legas bayan wani mugun tashi da Dala tayi.
Masu sana’ar saida kudin ketare sun tabbatar da farashin yana sauka, amma suna tsoron zai iya tashi idan dai Dala tayi wahala.
