Amurka ta ce ba ta da yakinin samun wani babban cigaba a tattaunawar zaman lafiya ta tsakanin Ukraine da Rasha da aka tsara yi a Turkiyya, bayan da bangarorin biyu suka kasa ganawa kamar yadda aka tsara a ranar Alhamis.
Ana sa ran sake yunkurin hada tawagogin kasashen biyu ranar Juma’a domin tattaunawar.
Sakataren harkokin wajen Amurka Marco Rubio wanda ya bayyana matsayar ta Amurka a kan wannan ganawa ta tawagar abokan gabar biyu – Ukraine da Rasha, ganawar da ke zaman ta farko ta gaba da gaba tun 2022, a kan yakin da suke yi, ya ce ba sa sa ran za a samu wani cigaba ba har sai Shugaba Trump ya gana keke da keke da takwaransa na Rasha Vladimir Putin domin sanin niyyar shugaban na Rasha.
Shi dai Shugaba Zelensky na Ukraine ya ce a shirye yake ya zauna tare da Mista Putin su tattauna, to amma ya ce bai yarda cewa Moscow ta dauki wannan magana da tattaunawa da muhimmanci ba.
Tun da farko an sa ran shugaban na Rasha zai je ganawar ta Turkiyya amma sai ya tura wata tawaga bisa jagorancin wani hadiminsa, abin da shugaban Ukraine yake ganin Rashar ba ta dauki batun da kima ba.
